29 чэрвеня, Мінск /Кар. БЕЛТА/. 29 чэрвеня 1944 года ішоў 1104-ы дзень вайны… У гэты дзень пачалася наступальная Мінская аперацыя войскаў 1-га, 2-га, 3-га Беларускіх франтоў і Полацкая аперацыя войскаў 1-га Прыбалтыйскага фронту.

У ходзе Беларускай аперацыі савецкія воіны, нягледзячы на бязлітаснае супраціўленне ворага, крок за крокам рухаліся наперад. Паспяхова развіваліся падзеі на левым крыле Беларускага выступу пад Бабруйскам, дзе наступалі ўдарныя групоўкі 1-га Беларускага фронту. Уведзеныя ў бой 1-ы і 3-і гвардзейскія танкавыя корпусы прарваліся ў тылы ворага і адрэзалі яму шляхі адступлення.

9-ы танкавы корпус генерала Б.С.Бахарава на вялікай скорасці накіраваўся па шашы да Бабруйска і раніцай 27 чэрвеня выйшаў на левы бераг Бярэзіны. Пераканаўшыся, што мост цераз раку разбураны, генерал Бахараў прыняў рашэнне часова перайсці да абароны, перахапіць шашу і пераправы цераз раку на паўночным усходзе ад Бабруйска, каб не дапусціць адыходу гітлераўцаў з раёна Жлобіна. У час імклівага наступу па шашы танкісты вызвалілі 5 тыс. савецкіх грамадзян, якіх гналі ў Германію, захапілі нямала палонных, знішчылі больш за 100 варожых салдат і афіцэраў. Тым часам танкісты 1-га гвардзейскага танкавага корпуса пад камандаваннем генерала М.Ф.Панова прарваліся на паўночным захадзе аб Бабруйска. Следам за імі рухаліся стралковыя дывізіі 3-й, 48-й і 65-й армій.

Па матэрыялах:

https://peramoga.belta.by/ru/chronicle?id=272622