25 красавіка 2019 года на вытворчай базе філіяла «Энергазбыт» РУП «Мінскэнерга» быў праведзены выязны практычны занятак для слухачоў спецыяльнасці «Дзелавое адміністраванне» Акадэміі кіравання пры Прэзідэнце Рэспублікі Беларусь у рамках вывучэння дысцыпліны «Кіраванне арганізацыяй».

Усяго ў занятку прыняло ўдзел 27 чалавек пад кіраўніцтвам прафесара кафедры кіравання рэгіянальным развіццём Акадэміі кіравання пры Прэзідэнце Рэспублікі Беларусь, доктара эканамічных навук Міхаіла Уладзіміравіча Пятровіча.

Слухачы наведалі цэх па рамонце прыбораў уліку электраэнергіі па адрасе Амельянюка, 18, а таксама разлікова-даведачны цэнтр па адрасе Фабрычная, 24. У ходзе занятка разглядаліся тэмы арганізацыйных структур кіравання, кантролю і кантролінгу ў кіраванні арганізацыяй. Акрамя таго, галоўны інжынер філіяла Алег Віктаравіч Егіпцаў азнаёміў удзельнікаў занятка з тэхналогіяй па рамонце прыбораў уліку электраэнергіі, працай аддзела абслугоўвання прыбораў уліку Мінскага аддзялення па збыце электрычнай энергіі, была наглядна прадэманстравана работа прыбора для вымярэння электраэнергетычных велічынь і паказчыкаў якасці электрычнай энергіі. У ажыўленай дыскусіі на ўсе пытанні навучэнцаў прадстаўнікамі філіяла былі дадзены адказы.