Добраахвотнае страхаванне дадатковай назапашвальнай пенсіі абмеркавалі ў філіяле «Энергазбыт» РУП «Мінскэнерга» 2 жніўня.

На пытанні энергетыкаў кампетэнтна адказалі Вікторыя Пендо, галоўны спецыяліст кансультацыйна-аналітычнага аддзела Мінскага гарадскога ўпраўлення Фонду сацыяльнай абароны насельніцтва, і Аляксандр Галабурда, вядучы спецыяліст упраўлення арганізацыі продажаў РУСП «Стравіта».

Спецыялісты расказалі супрацоўнікам філіяла аб пенсіённай сістэме Рэспублікі Беларусь, растлумачылі, што такое назапашвальныя пенсіі, падрабязна спыніліся на новым механізме добраахвотнага страхавання дадатковай назапашвальнай пенсіі, прывялі прыклады, як працуе гэты від страхавання.

Хто можа ўдзельнічаць у новым страхаванні? Якія перавагі атрымае яго ўдзельнік? Як аформіць дагавор? Ці можна скасаваць дагавор і забраць грошы раней наступу пенсійнага ўзросту? Што будзе з грашыма ў выпадку смерці работніка ці пенсіянера, калі ён не паспеў атрымаць свае выплаты? Гэтыя і іншыя тэмы абмеркавалі ўдзельнікі сустрэчы.

Згодна з Указам Прэзідэнта Рэспублікі Беларусь ад 27 верасня 2021 года №367 «Аб добраахвотным страхаванні дадатковай назапашвальнай пенсіі» ўводзіцца добраахвотнае страхаванне дадатковай назапашвальнай пенсіі. Ажыццяўляць яго будзе РУСП «Стравіта».

Работнік зможа накіроўваць дадатковы ўзнос на назапашвальную пенсію па выбраным ім тарыфе, але не больш за 10% ад фактычнага заробку. Са свайго боку, працадаўца выплаціць суразмерны тарыфу ўзнос, але не больш за 3%. Ужо на пенсіі чалавеку штомесяц будзе выплачвацца дадатковая назапашвальная пенсія на працягу 5 ці 10 гадоў. Назапашвальную пенсію можна ўспадкоўваць.

Уступіць у новую праграму можна не пазней, чым за 3 гады да дасягнення агульнаўстаноўленага пенсіённага ўзросту. Падаць заяву і заключыць дамову непасрэдна ў страхоўшчыка або ў электронным выглядзе праз афіцыйны сайт страхоўшчыка можна з 1 кастрычніка 2022 года. Дадатковыя ўзносы будуць пералічвацца працадаўцам у РУСП «Стравіта» па заяве работніка.

Уступленне работніка ў новую праграму ніяк не адаб'ецца на яго дзяржаўнай працоўнай (салідарнай) пенсіі. Яе памер будзе вызначацца па тых жа правілах, што і ў людзей, якія не ўдзельнічаюць у добраахвотным страхаванні.