- Навіны філіяла
«Лепшых па прафесіі» вызначылі ў філіяле «Энергазбыт»
Смотр-конкурс на званне «Лепшы па прафесіі» сярод каманд аддзяленняў філіяла «Энергазбыт» і збытавога падраздзялення філіяла «Барысаўскія электрычныя сеткі» РУП «Мінскэнерга» прайшоў на вучэбна-трэніровачным палігоне філіяла «Маладзечанскія электрычныя сеткі» 11-12 жніўня. Мерапрыемства накіравана на праверку прафесійнай падрыхтоўкі супрацоўнікаў, павышэнне ўзроўню іх кваліфікацыі і навыкаў, выяўленне кандыдатаў для ўдзелу ў рэспубліканскіх конкурсах.
На цырымоніі адкрыцця з пажаданнямі выступіў Вадзім Булыга, намеснік генеральнага дырэктара па збыце энергіі РУП «Мінскэнерга».
Усяго ў спаборніцтвах прынялі ўдзел 10 каманд. У склад кожнай уваходзілі чатыры чалавекі: інжынер па рабоце са спажыўцамі або майстар (старэйшы майстар), электраманцёр па эксплуатацыі электралічыльнікаў, кантралёр і кіраўнік каманды.
Праграма спаборніцтваў уключала як тэарэтычную, так і практычную частку. Фактар часу вызначаў шматлікае, але ў прыярытэце заставалася якасць выканання работ. Улічваліся і іншыя моманты: выкананне патрабаванняў аховы працы, стандартаў і іншых нарматыўных дакументаў.
На вучэбным палігоне былі змадэліраваны сітуацыі з умовамі, набліжанымі да рэальных, дзе ўдзельнікі змаглі прадэманстраваць свае ўменні і навыкі. З большасцю сітуацый энергетыкі сутыкаюцца ў сваёй паўсядзённай працы. Але гэта не значыць, што супрацоўнікаў не рыхтуюць да арганізаваных дзеянняў на выпадак аварыі: у ходзе спаборніцтваў удзельнікі вызвалялі пацярпелага ад дзеяння электрычнага току ў электраўстаноўках да 1000 В, адпрацоўвалі прыёмы рэанімацыі, аказвалі першую дапамогу.
Апроч вышэйпаказаных выпрабаванняў практычная частка уключала ў сябе наступныя этапы:
- праверка правільнасці працы сродка разліковага ўліку электраэнергіі ў размеркавальнай прыладзе 0,4 кВ з дапамогай спецыяльных прыбораў;
- афармленне дагаворных адносін з бытавым спажыўцом электраэнергіі;
- счытванне дадзеных з статычных лічыльнікаў электраэнергіі, правядзенне параметрызацыі;
- выяўленне фактаў спажывання электраэнергіі з парушэннем правілаў яе выкарыстання ў камунальна-бытавым сектары;
- правядзенне планавага наведвання бытавога абанента з афармленнем адпаведных дакументаў.
Па выніках конкурсу першае месца заваявала каманда Мінскага аддзялення па збыце электрычнай энергіі. «Лепшымі па прафесіі» сталі майстар Уладзіслаў Красоўскі, электраманцёр Дзяніс Кісель, кантралёр Надзея Раўтовіч і кіраўнік каманды Мікалай Пенкрат, намеснік начальніка аддзялення.
На другім месцы размясцілася каманда Маладзечанскага міжраённага аддзялення, а трэці вынік ‒ у работнікаў са Слуцка.
Віншуем нашых калег і жадаем ім далейшых поспехаў!