21 сакавіка ў Сусветны дзень паэзіі работнікі філіяла «Энергазбыт» РУП «Мінскэнерга» наведалі Купалаўскі мемарыяльны запаведнік «Вязынка».

Вёска Вязынка знаходзіцца ў зоне абслугоўвання Маладзечанскага міжраённага аддзялення філіяла «Энергазбыт», усяго за 50 кіламетраў ад сталіцы. Менавіта тут захаваўся дом арандатараў, у якім у 1882 годзе нарадзіўся Іван Луцэвіч ‒ будучы Народны паэт Беларусі Янка Купала. Створаная ў ім экспазіцыя прысвечана часу станаўлення асобы паэта. Кожная яе частка суправаджаецца радкамі з твораў Янкі Купалы і фрагментамі яго лістоў.

Знаходзячыся на тэрыторыі запаведніка, у адноўленых старадаўніх інтэр'ерах, акружаныя аўтэнтычнымі рэчамі таго часу працаўнікі філіяла змаглі па-сапраўднаму адчуць сувязь творчасці Янкі Купалы з гэтым месцам.

Акрамя музейнай экспазіцыі, прысвечанай паэту, супрацоўнікі філіяла наведалі гарадзішча культуры штрыхаванай керамікі II-IV стагоддзяў н.э., якое таксама размешчана на тэрыторыі комплексу.