- Навіны філіяла
Беларусь памятае — МЫ ПАМЯТАЕМ
У рамках рэспубліканскай героіка-патрыятычнай акцыі «Вялікай Перамозе — 80!», прысвечанай 80-годдзю вызвалення Рэспублікі Беларусь ад нямецка-фашысцкіх захопнікаў супрацоўнікі Слуцкага МРА філіяла «Энергазбыт» РУП «Мінскэнерга» прывялі ў парадак абеліск ахвярам Слуцкага гета.
Слуцк быў акупаваны войскамі вермахта 27 чэрвеня 1941 года. У той час у горадзе пражывала каля 14 000 яўрэяў. Большая частка яўрэяў у жніўні-кастрычніку была пераселена ў гета. Непрацаздольных вязняў гета невялікімі партыямі вывозілі ва ўрочышча Гараваха і там расстрэльвалі. 5 лютага 1943 года акупацыйныя ўлады выдалі загад аб ліквідацыі Слуцкага гета. Паколькі частка жыхароў гета схавалася ў загадзя падрыхтаваных сховішчах, нямецкае камандаванне прыняло рашэнне выкарыстоўваць агнямёты. Гета было цалкам спалена, а ўсе вязні забітыя.
Персанал Пухавіцкага МРА філіяла «Энергазбыт» РУП «Мінскэнерга» таксама добраўпарадкаваў індывідуальную магілу радавога Перфільева Івана Якаўлевіча, размешчаную ў в. Цітва, Пухавіцкага раёна, Мінскай вобласці.
Тут пахаваны Іван Перфільеў, які загінуў 5 ліпеня 1944 года пры вызваленні раёна ад нямецка-фашысцкіх захопнікаў падчас правядзення аперацыі «Баграціён». У 1964 годзе на магіле ўсталявана мармуровая стэла.
Супрацоўнікі Стаўбцоўскага МРА філіяла «Энергазбыт» РУП «Мінскэнерга» прывялі ў парадак тэрыторыю ля помніка «Стэла вызваліцелям».
Горад Стоўбцы быў вызвалены 2 ліпеня 1944 года. Вызваленне ад нямецка-фашысцкіх захопнікаў гэтага раённага цэнтра і некаторых іншых гарадоў і буйных населеных пунктаў паўднёвай і паўднёва-заходняй часткі сучаснай Міншчыны стала магчымым дзякуючы тактычнаму ходу, распрацаванаму камандуючым 1-м Беларускім фронтам генералам арміі Канстанцінам Ракасоўскім.
Наш святы абавязак — шанаваць памяць аб тых, хто ахвяраваў сваім жыццём дзеля нашай свабоды і будучыні.