- Навіны філіяла
26 КРАСАВІКА СПАЎНЯЕЦЦА 38 ГАДОЎ З ДНЯ АВАРЫІ НА ЧАРНОБЫЛЬСКАЙ АТАМНАЙ ЭЛЕКТРАСТАНЦЫІ
26 красавіка 1986 г. у 01:23 адбылася самая страшная тэхнагенная катастрофа ў гісторыі чалавецтва — аварыя на Чарнобыльскай атамнай электрастанцыі. 38 гадоў аддзяляюць нас ад тых трагічных падзей.
Актыўная зона рэактара была цалкам разбурана, а ў навакольнае асяроддзе выкінута вялікая колькасць радыеактыўных рэчываў. Павышэнне радыяцыйнага фону фіксавалася па ўсёй Еўропе, але найбольш пацярпелі Беларусь, Украіна і Расія. Значныя выкіды з разбуранага рэактара працягваліся 10 дзён запар да 6 траўня 1986 года.
Катастрофа на Чарнобыльскай атамнай электрастанцыі прынесла вялізныя разбурэнні, але дзякуючы адважным дзеянням ліквідатараў, якія не пашкадавалі свайго жыцця і здароўя, удалося пазбегнуць яшчэ большай колькасці ахвяр. Іх гераічныя намаганні прадухілілі больш шырокае распаўсюджванне радыяцыйнага заражэння.
Удзельнічалі ў ліквідацыі і супрацоўнікі філіяла «Энергазбыт» РУП «Мінскэнерга». Сярод іх вадзіцель Уздзенскага вытворча-збытавага ўчастка Уладзімір Мятліцкі і былы начальнік Вілейскага міжраённага аддзялення, які зараз знаходзіцца на заслужаным адпачынку, Аляксандр Башлакоў. З успамінаў Аляксандра Васільевіча:
«Працаваў інжынерам-энергетыкам ДРБУ-162 г. Вілейкі. У чэрвені 1987 года па заданні «Мінаблдарбуда» ў складзе брыгады з 9 чалавек быў накіраваны на будаўніцтва асфальтабетоннага завода ў раёне г. Брагіна. Займаўся будаўніцтвам знешніх сетак завода і мантажом унутраных электрасетак з падключэннем сілавога абсталявання і аўтаматыкі, далейшай наладкай і пускам завода. У далейшым тут выпускаўся асфальтабетон для ўладкавання цвёрдага пакрыцця дарог і вуліц населеных пунктаў, якія знаходзяцца за 10 км ад зоны адчужэння. Прапрацаваў у небяспечнай зоне да кастрычніка 1987 года (усяго 54 дні)».
Аляксандр Васільевіч узнагароджаны медалём, як удзельнік ліквідацыі наступстваў аварыі на ЧАЭС.
Кіраўніцтва і калектыў філіяла «Энергазбыт» выказваюць свае шчырыя спачуванні сем'ям, якія страцілі блізкіх, і глыбокую падзяку ліквідатарам Чарнобыльскай катастрофы. Ваша мужнасць і самаахвяраванне выклікаюць захапленне. Дзякуй за ваш гераізм!