- Навіны філіяла
Супрацоўнік філіяла «Энергазбыт» РУП «Мінскэнерга» узнагароджаны юбілейным знакам Беларускай энергасістэмы
Супрацоўнік філіяла «Энергазбыт» РУП «Мінскэнерга» (сёння на заслужаным адпачынку) Жорж Фаміч Лопан узнагароджаны юбілейным знакам Беларускай энергасістэмы, якая ў гэтым годзе адзначыла сваё 90-годдзе.
Усяго ў энергасістэме Жорж Фаміч прапрацаваў больш за 46 гадоў.
Жорж Фаміч Лопан нарадзіўся ў 1941 годзе ў вёсцы Саковічы Салігорскага раёна. Пасля школы паступіў у Гродзенскі тэхнікум чыгуначнага транспарту. У 1958 годзе тэхнікум быў зачынены, а Жорж Фаміч працягнуў сваё навучанне ў Чыгуначным тэхнікуме г.Курска па спецыяльнасці тэхнік-энергетык электрафіцыраваных чыгунак. Сваю працоўную дзейнасць пачаў на пасадзе электраманцёра ЭМП №703 на станцыі «Прохараўка».
У кастрычніку 1960 года Жоржа Фаміча прызвалі ў армію. Па заканчэнні службы працаваў у метро г.Масквы і на камбінаце цвёрдых сплаваў дзяжурным электрыкам.
Шлях у Беларускай энергасістэме пачаў у 1964 годзе тэхнікам Дзяржынскага ўчастка Мінскага РЭС. Пазней быў пераведзены ў Слуцкі РЭС інжынерам размеркавальных сетак.
У кастрычніку 1967 года Жоржа Фаміча прызначылі начальнікам Слуцкага сельскага ўчастка электрасетак. З 1971 года кіраваў участкам ПМК-1 трэсту «Энергамантаж».
У красавіку 1977 года узначаліў Слуцкае міжраённае аддзяленне філіяла «Энергазбыт».
За шматгадовую працу ў энергасістэме Жорж Фаміч унёс свой значны ўклад у яе развіццё, зарэкамендаваў сябе як граматны кіраўнік, прафесіянал, які любіць і ведае сваю справу.
Віншуем нашага заслужанага энергетыка з узнагародай! Жадаем моцнага здароўя і даўгалецця!