Фестываль «Беларусіяда» прайшоў у восьмы раз у філіяле «Энергазбыт» РУП «Мінскэнерга» ў мінулыя выхадныя. У гэтым годзе ён быў прымеркаваны да Года гістарычнай памяці.

Маштабнае мерапрыемства сабрала на беразе ракі Нёман на Стаўбцоўшчыне больш за 300 чалавек. Усяго ў фестывалі прынялі ўдзел 17 каманд. Сярод іх традыцыйна практычна ўсе падраздзяленні філіяла «Энергазбыт»: каманды Маладзечанскага, Пухавіцкага, Клецкага, Вілейскага, Слуцкага, Салігорскага, Стаўбцоўскага міжраённых аддзяленняў, Мінскага аддзялення па збыце электрычнай энергіі, Мінскага аддзялення па збыце цеплавой энергіі, службы аўтаматызаваных сістэм кантролю і ўліку. Ад апарата кіравання філіяла сёлета заявіліся адразу дзве каманды. Былі на фестывалі і дэбютанты – запрошаныя каманды РУП «Мінскэнерга», філіялаў «Мінскія электрычныя сеткі», «Мінскія кабельныя сеткі», «Стаўбцоўскія электрычныя сеткі», «Мінскэнергаспецрамонт».

У склад журы ўвайшлі намеснік генеральнага дырэктара ДВА «Белэнерга» Андрэй Пятровіч Шэршань, генеральны дырэктар РУП «Мінскэнерга» Алег Анатольевіч Шчэмель, намеснік генеральнага дырэктара РУП «Мінскэнерга» Фамянкоў Дзмітрый Мікалаевіч, дырэктар філіяла «Энергазбыт» Аляксандр Георгіевіч Мароз, галоўны рэдактар газеты «Энергетыка» Беларусі» Русецкая Вольга Сяргееўна, старшыня Савецкага раённага г.Мінска аб'яднання арганізацый прафсаюзаў Зверко Галіна Іванаўна.

Конкурсныя іспыты праходзілі на працягу двух дзён. Першым стаў конкурс «Беларуская песня». Перад камандамі стаяла задача выканаць песню на беларускай мове, а таксама творча аформіць яе выкананне. Так конкурс ператварыўся ў сапраўдны канцэрт. Тут можна было атрымаць асалоду ад меладычнага вакалу, пачуць старажытныя і сучасныя матывы, песні на вершы беларускіх класікаў і ўласнага сачынення. У выніку самай спяваючай апынулася каманда «Тутэйшыя» Клецкага міжраённага аддзялення, срэбра ў каманды «ШОК» з апарата кіравання «Мінскэнерга», трэцяе месца занялі «Масэвікі-забаўнікі» з Мінскага аддзялення па збыце электрычнай энергіі.

Другі дзень фестывалю ўключаў адразу два конкурсы і пачаўся з праверкі гасціннасці каманд. Удзельнікі сустракалі гасцей па-беларуску – са шчырасцю, цяплом і пачастункамі, успаміналі нацыянальныя традыцыі і абрады, здзіўлялі прыгажосцю касцюмаў. У гэтым спаборніцтве каманда «Тутэйшыя» зноў атрымала ўпэўненую перамогу.

Пасля абеду ўсе сабраліся на самы відовішчны конкурс фестывалю «З жыцця…». З дапамогай розных выразных сродкаў каманды пагрузілі гледачоў у свет прафесійнай дзейнасці энергетыкаў. Іскрамётны гумар, крэатыў і артыстызм удзельнікаў зараджалі ўсіх весялосцю і пазітывам.

Іван Васільевіч і яго верны падданы з Маладзечна, супергероі-беларусы, экстравагантныя мужчынскія вобразы ад Салігорска, сон дырэктара з варажбіткай і егіпцянінам, Чырвоная Шапачка, чароўная Баба Яга, дзяўчынкі фабрычныя, галчонак з Прастаквашына, танцы з бубнам вакол лічыльніка, оперупаўнаважаны бухгалтар, урок электрабяспекі ад Мінскіх электрычных сетак, царская нарада, палёт у космас і шмат іншага яшчэ надоўга застануцца ў памяці гасцей фестывалю.

Па выніках першае месца ў конкурсе «З жыцця…» заваявалі «Праменьчыкі святла» з «Мінскіх электрычных сетак», другую прыступку п'едэстала заняла каманда «Пан Пухаў» з Пухавіцкага міжраённага аддзялення, бронзу атрымала каманда «Сябры» філіяла «Мінскэнергаспецрамонт». Акрамя таго, былі вызначаны лаўрэаты ў спецыяльных намінацыях.

Як адзначылі члены журы, Беларусьяда – фестываль, дзе заўсёды перамагае сяброўства. Фестываль, які дорыць неверагодныя эмоцыі і цудоўную магчымасць не толькі раскрыць у сабе новыя таленты і пагрузіцца ў свет творчасці, але і пагутарыць з калегамі, абмяняцца думкамі, адчуць сябе часткай вялікага дружнага калектыву энергетыкаў.