- Навіны філіяла
Супрацоўніца філіяла "Энергазбыт" РУП "Мінскэнерга" прыме ўдзел у выставе " Тулуз-Латрэк. Страсці ў " Мулен Руж»
Кантралёр філіяла «Энергазбыт» РУП «Мінскэнерга» Надзея Раўтовіч прыме ўдзел у выставе «Тулуз-Латрэк. Страсці ў «Мулен Руж», якая 1 кастрычнiка адкрыецца ў Мастацкай галерэі Міхаіла Савіцкага.
На выставе будуць прадстаўлены больш за 50 каляровых літаграфій французскага мастака з прыватных еўрапейскіх калекцый, а таксама работы вядомых і пачынаючых беларускіх аўтараў. У іх ліку Надзея Раўтовіч.
Надзея нарадзілася і вырасла ў Мінску. У філіяле «Энергазбыт» РУП «Мінскэнерга» працуе 9 гадоў. Акрамя любімай працы ў жыцці дзяўчыны ёсць любімае захапленне ‒ вязанне.
‒ Гэта свайго роду медытацыя, выдатны спосаб пераключыцца, упарадкаваць думкі, захаваць душэўную гармонію, ‒ адзначае Надзея. ‒ Зніжаецца стрэс, паляпшаецца памяць, развіваецца не толькі дробная маторыка, але і такія якасці, як цярплівасць, уважлівасць, што немалаважна і ў маёй працы.
Вязаць 9-гадовую Надзю навучыла мама. У гэтым узросце ў дзяўчынкі выявілі рэдкае і складанае захворванне пазваночніка. Два гады яна правяла дома, лежачы ў спецыяльнай гіпсавай выцяжцы. Да 16 гадоў праходзіла рэгулярныя рэабілітацыі. У перыяд лячэння вязанне ўносіла разнастайнасць у будні Надзі, напаўняла іх творчасцю, дапамагала перамагчы хваробу, з якой яна паспяхова справілася.
Сёння Надзея вяжа карціны. Незвычайная ідэя ўзнікла падчас удзелу ў конкурсе творчых работ супрацоўнікаў філіяла «Энергазбыт». Менавіта тады з'явілася першая вязаная карціна. Праца была прызнана лепшай у намінацыі «Вязанне». Такі добры старт натхніў дзяўчыну на далейшыя подзвігі.
Надзея вяжа карціны ў стылі арт-дэко, робіць рэпрадукцыі палотнаў вядомых мастакоў. У сваёй творчасці выкарыстоўвае тэхніку каляровага вязання «інтарсія», калі кожны элемент вывязываецца з асобнага клубка. Пры гэтым карціна вяжацца суцэльным палатном, і адначасова можа быць задзейнічана больш за 25 розных нітак.
Калекцыя карцін Надзеі налічвае ўжо каля 25 работ. Сярод іх цэлая серыя жаночых вобразаў, у тым ліку і рэпрадукцыя афішы Анры дэ Тулуза-Латрэка «Мулен Руж: Ла Гулю» 1891 года, якую можна будзе ўбачыць на выставе. Дарэчы, гэта ўжо пятая па ліку выстава, дзе будуць выстаўляцца работы Надзеі.
Жадаем далейшых творчых поспехаў нашай калеге!