Сёння, 15 лютага, мы адзначаем Дзень памяці воінаў-інтэрнацыяналістаў. У гэты дзень у 1989 годзе завяршыўся вывад савецкіх войскаў з Афганістана, дзе больш за 9 гадоў доўжылася вайна. 

Каля 30 тысяч беларусаў бралі ўдзел у баявых дзеяннях, каля 2 тысяч атрымалі раненні і калецтвы, больш за 700 нашых землякоў не вярнуліся з Афганістана. 

Дзень памяці воінаў-інтэрнацыяналістаў ‒ гэта даніна павагі ўсім тым, хто самааддана і мужна выконваў воінскі абавязак за межамі сваёй Радзімы. Мы шануем загінуўшых і падзяляем увесь боль страты з тымі, хто страціў у ваенных падзеях сваіх родных і блізкіх. Мы выказваем глыбокую ўдзячнасць усім, хто вярнуўся жывым дадому. Гэты дзень назаўжды застанецца сімвалам доблесці, стойкасці і гонару. 

Сярод воінаў-інтэрнацыяналістаў ёсць і нашы калегі. Гэта Галай Мікалай Мікалаевіч, Церах Андрэй Віктаравіч, Трубач Андрэй Валер'евіч. 

Жадаем ім і ўсім воінам-інтэрнацыяналістам, іх родным і блізкім здароўя, дабра, дабрабыту і толькі мірнага неба над галавой. Дзякуй вам за ваш подзвіг! 

Галай Мікалай Мікалаевіч нарадзіўся ў в.Тульгавічы Хойніцкага раёна. Пасля заканчэння сярэдняй школы атрымаў спецыяльнасць вадзіцеля. У красавіку 1984 года закліканы Гомельскім РВК у паветрана-дэсантныя войскі. Пасля праходжання горна-стралковага навучальнага цэнтра ў г.Фергана Узбекскай ССР полк, у якім нёс службу радавы Галай М.М., быў накіраваны ў Афганістан. Падчас выканання інтэрнацыянальнага абавязку быў паранены. Дэмабілізаваны ў траўні 1986 года. З 2004 года працуе ў Маладзечанскім міжраённым аддзяленні на пасадзе вадзіцеля.

 Крываў Валерый Уладзіміравіч праходзіў ваенную службу ў Афганістане з 1983 па 1985 год. Узнагароджаны медалём «За баявыя заслугі», ордэнам «За адвагу». З 2018 года працуе ў службе аўтаматызаваных сістэм кантролю і ўліку электраэнергіі на пасадзе электраманцёра па эксплуатацыі электралічыльнікаў. 

Церах Андрэй Віктаравіч нарадзіўся ў в.Мацькоўцы Вілейскага раёна. Пасля заканчэння вучылішча ў 1982 годзе, дзе навучаўся прафесіі вадзіцеля аўтакрана, быў прызваны на тэрміновую ваенную службу. Каля двух месяцаў праходзіў курс маладога байца ў Узбекістане, пасля чаго 22.06.1982 быў адпраўлены ў Афганістан, служыў старшым разведчыкам-кулямётчыкам да 1984 года. У 1985 годзе ўзнагароджаны ордэнам Чырвонай Зоркі. З 2004 года працуе ў Вілейскім міжраённым аддзяленні на пасадзе кантралера.

Трубач Андрэй Валер'евіч накіраваны ў Афганістан 20.02.1986 пасля «вучэбкі». Праходзіў ваенную службу ў Кандагары на блок-пасту па ахове кандагарского аэрадрома кіроўцам-радыетэлефаністам, старшым вадзіцелям да 1987 года. З 2018 года працуе ў Стаўбцоўскім міжраённым аддзяленні на пасадзе вадзіцеля.