- Навіны філіяла
Дзень энергетыка: святочныя інтэрв'ю супрацоўнікаў філіяла «Энергазбыт» РУП «Мінскэнерга»
Сёння электраэнергія стала неад'емнай часткай жыцця чалавека, галоўнай умовай камфорту, асновай развіцця эканомікі. Кожны дзень мільёны людзей карыстаюцца вынікамі працы работнікаў энергетычнай галіны. Гэтая сфера дзейнасці аб'ядноўвае спецыялістаў розных прафесій, у якіх ёсць адна агульная мэта ‒ несці людзям святло і цяпло.
У гэтым годзе Беларуская энергасістэма адзначыла свой 90-гадовы юбілей. За гэты час быў пройдзены вялікі шлях развіцця, і мы па праве можам ганарыцца тым, што захавалі і прымножылі энергетычны патэнцыял краіны.
Аднак паспяховае развіццё любой галіны немагчымае без спецыялістаў, якія ведаюць сваю справу і адданыя ёй усёй душой. За складанай і адказнай задачай энергазабеспячэння краіны стаіць дакладная карпатлівая работа кожнага супрацоўніка паасобку і зладжаная работа ўсяго калектыву энергасістэмы ў цэлым.
Напярэдадні Дня энергетыка супрацоўнікі філіяла «Энергазбыт» РУП «Мінскэнерга» адказалі на пытанні аб сваёй працы, павіншавалі калег са святам.