Рэспубліканская добраахвотная акцыя «Тыдзень лесу» стартуе ў Беларусі 9 красавіка і пройдзе да 16 красавіка. Мерапрыемства будзе прымеркавана да Года гістарычнай памяці.

Сёлета акцыя пройдзе ўжо ў 15-ы раз. Штогод яна ахоплівае ўсё большую колькасць удзельнікаў і кропак на карце краіны. Толькі ў 2021 годзе ў акцыі прынялі ўдзел каля 60 тысяч чалавек. Праца валанцёраў была арганізавана амаль на 3 тысячах аб'ектаў. Усяго за 7 дзён работнікі лясгасаў разам з валанцёрамі высадзілі 33 188 814 дрэў.

Стаць удзельнікам акцыі можа кожны. Для гэтага дастаткова звярнуцца ў бліжэйшую лясную гаспадарку.

Адна з асноўных мэт кампаніі – выхаванне беражлівых адносін да лесу. Акцэнт будзе на працы з моладдзю. Кожны ўдзельнік акцыі ва ўзросце да 18 год атрымае сувенір.

Па традыцыі Мінлясгас адзначыць самых крэатыўных удзельнікаў акцыі. Для гэтага трэба зрабіць крэатыўнае фота ці відэа і размясціць іх у сацыяльных сетках з хэштэгамі #ТыдзеньЛеса2022 і #ТыдзеньЛесу2022. Будзе абрана адразу 10 пераможцаў, якія атрымаюць памятныя сувеніры ад беларускіх леснікоў.